Líkaminn er skapaður fyrir hreyfingu og ef við notum hann ekki hrörnar hann og gefur sig. Glöggt dæmi um þetta er að ef útlimur er settur í gips rýrna vöðvarnir sem undir eru og missa styrk sinn. Sama gildir um annað í líkamanum svo sem hjarta og bein. Þannig að ef ekki er reynt áhjarta, vöðva og bein með hreyfingu getur það valdið sjúkdómum seinna á lífsleiðinni svo sem hjarta- og æðasjúkdómum, beinþynningu, vöðvabólgum og bakverkjum. Hreyfing hefur einnig áhrif á fleiri þætti. Þannig hefur verið sýnt fram á með rannsóknum að hreyfing á yngri árum hefur áhrif á lífsstíll seinna meir. Unglingar sem þjálfa reglubundið reykja síður, eru að meðaltali léttari, ná betri námsárangri og líður betur.
Foreldrar eru mikilvægir mótunaraðilar í hreyfivenjum barna. Jákvætt viðhorf og hvatning foreldra ásamt því að vera góðar fyrirmyndir skiptir sköpum fyrir barnið.
Þá er einnig gott að hafa í huga að hreyfing barna þarf ekki að vera skipulögð. Leikurinn ætti að vera rauði þráðurinn í hreyfingu barna, ein klukkustund á dag utan skólatíma í leikjum úti er fyllilega nóg fyrir börn en þau mega alltaf hreyfa sig meira.
Við hvetjum því foreldra til að gefa börnum sínum gott veganesti út í lífið með því að hvetja þau til að hreyfa sig á hverjum degi.